Հայաստան եկած ՏՏ ընկերություններն արդեն գնում են Վրաստան, որտեղ նրանց բարենպաստ պայմաններ են առաջարկում․ Սևակ Հովհաննիսյան

Հայաստան եկած ՏՏ ոլորտի ռելոկանտ ընկերություններն սկսել են տեղափոխվել այլ երկրներ, որտեղ ավելի նպաստավոր պայմաններ են առաջարկվում նրանց։ Այս մասին այսօր ՏՏ ոլորտը կարգավորող նոր օրենսդրական փաթեթի վերաբերյալ խորհրդարանական լսումների ժամանակ ասաց ՏՏ համայնքի կողմից ստեղծած աշխատանքային խմբի ներկայացուցիչ Սևակ Հովհաննիսյանը։

«Արդեն իսկ տեղի է ունենում ևս մեկ ռելոկացիա, արդեն Հայաստանից տեղափոխում ․․․ Այսօր մենք ունենք փաստացի տվյալներ, որ շատ ընկերություններ, որոնք 700-800 աշխատակից բերել էին Հայաստան, սակայն արդեն դրանց մեծ մասը տեղափոխել են Վրաստան, որովհետև Վրաստանն ագրեսիվորեն նրանց ավելի բարենպաստ պայմաններ է առաջարկում։

Սևակ Հովհաննիսյանը նշեց, որ 2023-ից սեպտեմբերից Հայաստանում նկատվում է ՏՏ ոլորտում զբաղվածների քանակի նվազում։ «Կա նախնական հիպոթեզ, որ 2023-ը վատ չի եղել, բայց տեսնում ենք 2023-ի վերջի դրությամբ, ներառյալ 2024-ի հունվարը, որոշակի բացասական միտումներ արդեն առկա են աշխատողների թվաքանակի կրճատման մասով»,- ասաց նա։ Սևակ Հովհաննիսյանը նշեց, որ այս մասին, այդուհանդերձ, ամբողջական պատկերը տեսանելի չէ, քանի որ Պետական եկամուտների կոմիտեն դեռ չի ներկայացրել այդ ընկերությունների վճարած հարկերի վերաբերյալ 2023-ի ողջ տվյալները, որոնք ստանալուն պես արդեն կկարողանան ամբողջական պատկերը տեսնել։