ԾԱՂԿԻ ԽԱՆՈՒԹԻ ՏԵՐԸ ՀԱՆՈՒՆ ՇՆԵՐԻ ԴԱՆԱԿՈՎ ՀԱՐՁԱԿՎԵԼ Է ՔԱՂԱՔԱՊԵՏԱՐԱՆԻ ԱՇԽԱՏՈՂՆԵՐԻ ՎՐԱ
- Lida Nalbandyan
- Jan 23, 2024
- 2 min read
Քիչ առաջ քաղաքացիներից մեկից զանգ ստացանք, որ Փափազյան- Կոմիտասի պողոտա խաչմերուկում քաղաքապետարանի աշխատակիցների ու ծաղի խանութի աշխատակիցների միջև կռիվ- ղալմաղալ է տեղի ունեցել։ Քաղաքացու տպավորությամբ՝ հավանաբար արգելել են ծաղիկ վաճառել, սակայն պարզեցինք, որ վիճաբանության պատճառը ամենևին էլ ծաղի վաճառքի արգելքը չէ։ Արաբկիրի փոխթաղապետ Գեղամ Կարապետյանը մեզ հետ զրույցում ասաց, որ ծաղկի տաղավարի տերը հենց տաղավարում 3 հատ փողոցային շուն է պահել, և երբ քաղաքապետարանի աշխատակիցները փորձել են շներին տանել, դանակով հարձակվել է աշխատողների վրա․
«Ոչ թե ծաղիկ վաճառելն է արգելվել, այլ հետևյալն է տեղի ունեցել․ իհարկե, ծաղիկ վաճառելու իրավունք մենք ունենք, սակայն այս պարագան լրիվ այլ է։ Ծաղկի սրահում աշխատող տղամարդը ծաղկի համար նախատեսված տաղավարում մի քանի հատ շուն է պահել, այո, փողոցի շներից բերել-պահել է։ Էդ շները ժամանակ առ ժամանակ այդ տաղավարից դուրս էին գալիս, վնասվածքներ հասցնում մարդկանց․ կծում են, հարձակվում են, վախեցնում են երեխաներին։ Ահազանգ է լինում Երևանի քաղաքապետարանի համապատասխան ՀՈԱԿ-ին, որ այդտեղ կան շներ և մարդիկ չգիտեն․․․, դա անօրինական է, այդտեղ չի կարելի շուն պահել, դա ծաղկի համար նախատեսված տաղավար է, որ դարձել է շան բույն հենց փողոցի մեջտեղը, երկրորդը՝ դրանք վնաս են տալիս մարդկանց և պետք է ստերիլիզացնել այդ շներին, որպեսզի դրանք հանրության համար անվտանգ լինեն։ Երբ համապատասխան ՀՈԱԿ-ի աշխատակիցները մեր թաղապետարանի առևտրի բաժնի աշխատակիցների հետ համատեղ մոտենում են, որպեսզի շներին տանեն ստերիլիզացման, այդ տաղավարի տերը, ով շներին պահում է տվյալ տաղավարի մեջ, դանակով հարձակվում է վերջիններիս վրա։ Այսինքն՝ փաստացի հանցագործություն, դանակի սպառնալիքով հարձակվում է, և բարեբախտաբար ոչ մեկին բան չի լինում, որովհետև վայրից հեռանում են։ Այդ մարդը հենց հիմա հետախուզման մեջ է, ոստիկանություն դիմել ենք, որոնվում է, թե ինչ գործողություն պետք է անեն, այդ հարցին չեմ կարող պատասխանել, բայց նա դանակի սպառնալիքով հարձակվել է իրենց աշխատանքային պարտականությունները կատարող պետական աշխատողների վրա, հետևաբար դա, բնականաբար, քրեորեն պատժելի արարք է և դրանով օրինապահ մարմինները զբաղվում են»,- ասաց փոխթաղապետը՝ հավելելով, որ խոսքը փողոցային շների մասին է, այլ ոչ թե անձնագիր ունեցող, պատվաստված շների։
