ՆՈՒԲԱՐԱՇԵՆԻ ԲՆԱԿՉԻՆ ԴԱՏՈՒՄ ԵՆ ՇԱՆԸ ԾԵԾԵԼՈՒ ՀԱՄԱՐ

Միշան շուն է` ապրում է իր փրկչի՝ կենդանասեր Մարի Տեր-Անտոնյանի կացարանում, Մասիսում։ Միշայի տերը՝ Նուբարաշենի բնակիչ Գ․Ա-ն նրան շան ծեծ է տվել, կրակել է «շեշմայով»։

Կենդանասերները տարել են անասնաբուժական կլինիկա, վիրահատել են, բազմաթիվ բեկորներ հանելով Միշայի մարմնից։ Մի մասը հանել հնարավոր չի, և շունը ապրելու է` բեկորները մարմնում։ Այժմ նա Մարիի կացարանում է, Մասիսում։ Խոշտանգողն ամբաստանյալի աթոռին է։ Նրան մեղադրանք է առաջադրվել այն բանի համար, որ նա 2023 թվականի օգոստոսի 29-ին՝ ժամը 15:30-ի սահմաններում, իր բնակության վայր հանդիսացող՝ Երևան քաղաքի Նուբարաշեն Բ-8 Այգեգործական թաղամասի 16-րդ հասցեում գտնվող տնակի դիմաց, տառապանք պատճառելու ուղղակի դիտավորությամբ՝ փայտով բազմաթիվ հարվածներ է հասցրել իր շան գլխի և մեջքի հատվածներին՝ այդ կերպ շան նկատմամբ դրսևորել՝ դաժան վերաբերմունք: Մարի Տեր-Անտոնյանը անհերքելի փաստ է ներկայացրել Էրեբունու ոստիկանություն` տեսանյութ, որում երևում է, թե ինչպես է Գ-ն դաժանորեն ծեծում Միշային։

«Մեղադրանքը կառուցվել է միայն դաժան ծեծի հիմքերով, կրակելու մասով ոչինչ չկա, որովհետև տեսանյութում, որը մենք տրամադրել էինք, միայն երևում էր ծեծը, թեև մենք քննիչին տրամադրել էինք ռենտգեն նկարը, որտեղ տեսանելի են շեշմաները», - ասում է Մարի Տեր-Անտոնյանը։  Նա վստահ չի, որ դատարանը չի ազատելու տղամարդուն պատժից։

Հիշեցնում է Ալ-Կապոնե անունով շանը տանջանքների ենթարկած Հրազդանի բնակչի գործը։ Դատական նիստերն այնքան ձգեցին, որ վաղեմության ժամկետն անցավ և տղամարդուն ազատ արձակեցին։ Հայաստանում դեռևս տարածված է գիտակցությունը, որ շանը տանջելն ու սպանելը հանցանք չի։ 

Ամբողջական հոդվածը կարող եք կարդալ այս հասցեով՝ : https://hraparak.am/post/351033496270d5e0310ea8024f78c50d?fbclid=IwAR3qN7h9nAGyGyi_tN6tYOE6mcM21DWCqUN6Fn0igdA9hWF1ZUjPpEGwaHc_aem_Afts6YiHV5wZ78Lhvv6OHFDjkGNORi2YTUIsCkOXVoC4f5PIPFQgnmcFaQcYtpaINBo

© 2008 - 2021 «Հրապարակ օրաթերթ»