Խաչիկ գյուղում 2 բնակիչ վարկ է վերցրել, երաշխավոր դարձած 77 գյուղացի հայտնվել է սև ցուցակում․ կառավարությունը նրանց գումար կհատկացնի
- Lida Nalbandyan
- Feb 29, 2024
- 1 min read
Վայոց ձորի մարզի Խաչիկ գյուղում երկար ժամանակ է մի խնդիր կա։ Գյուղի 2 բնակիչ վարկ են վերցրել ու ամբողջ գյուղին դարձրել են վարկի երաշխավոր։
Այս մասին կառավարության նիստի ժամանակ ասաց վարչապետ Նիկոլ Փաշինյանը։
«Այս փաստի հետ կապված քրեական գործ էլ կա հարուցված։ Պարզ է չէ, երկու հոգի վարկ են վերցրել, չգիտեմ ինչ մեխանիզմով ամբողջ գյուղին դարձրել են երաշխավոր։ Ամբողջ գյուղը հայտնվել է սև ցուցակում. չեն կարող ոչ վարկ վերցնել, ոչ մի բան։ Այս թեմային առնչվել եմ այն ժամանակ, երբ պատգամավոր էի։
Հետո անընդհատ մոտենում էինք այս թեմային ու փորձում էինք գտնել լուծում։ Կառավարության այսօրվա նիստում կայացրել ենք եզակի որոշում, ինչը չպետք է ընկալվի որպես գործելակերպ։ Որոշել ենք պետական բյուջեից 65.7 մլն դրամ հատկացրել Խաչիկ գյուղի բնակիչներին, որոնք երաշխավորն են դարձել, բացի այն երկուսից, ովքեր սկսել են այս պատմությունը»,- ասաց Փաշինյանը։
Ըստ վարչապետի՝ այսօրվա որոշումից հետո կզրոյացվեն Խաչիկ գյուղի բնակիչների վարկային պարտավորությունները, որ այս սխեմայի զոհ էին դարձել։ Նա հավելել է, որ այդ քաղաքացիները հնարավորություն կունենան ծրագրերից օգտվել, վարկեր ստանալ.
«Բայց խնդրում եմ, որ Խաչիկի մեր սիրելի հայրենակիցները նման պատմության մեջ չընկնեն: Մյուս գյուղերի բնակիչները՝ ևս»։
ԿԲ փոխնախագահ Հովհաննես Խաչատրյանն էլ հայտնել է, որ սա եզակի դեպք է, ու քրեական գործ կա․
«Գործի արդյունքում պարզվել է՝ որոշ վարկառուներ նաև վարկառու են, միայն երաշխավոր չեն, բայց նրանց գումարը այլ անձինք են ստացել։ 77 քաղաքացու մասին է խոսքը»։
