Ադրբեջանի ԱԳՆ-ն պատասխան է պահանջում Հայաստանի ՊՆ-ից և կոպտում՝ Փաշինյանին

Ադրբեջանի ԱԳՆ-ն հայտարարություն է տարածել՝ ի պատասխան կառավարության այսօրվա նիստում Հայաստանի վարչապետի ասածի:

Հիշեցնենք, որ Փաշինյանը գնահատել է Ադրբեջանի գործողությունները՝ կապված փետրվարի 13-ին հայկական դիրքերի գնդակոծման հետ, ինչպես նաև հիշեցրել է, որ 31 հայկական գյուղերի տարածքները դեռևս օկուպացված են Ադրբեջանի կողմից։

Ի պատասխան՝ Ադրբեջանի ԱԳՆ-ն ագրեսիայի մեղադրանքներն անվանել է «անհիմն», և դրանք, իբր, «ուղղված են տարածաշրջանում լարվածություն ստեղծելուն»։ Որպես «ապացույց», որ Երևանն է եղել սրման նախաձեռնողը, Ադրբեջանի ԱԳՆ-ն օգտագործում է «բոլորը քաջատեղյակ են» ձևակերպումը։

«Օգտակար կլինի նաև բացատրություն տալ, թե ինչու դեռևս չեն իրականացվել Հայաստանի պաշտպանության նախարարության խոստումները՝ հետաքննություն անցկացնելու ադրբեջանցի զինծառայողի վիրավորման վերաբերյալ, ինչպես նաև պարզաբանել, թե ինչ հիմքով են Հայաստանի սահմանային դիրքերում տարբեր ռազմական խմբավորումներին պատկանող վարձկանները ենթարկվում պաշտպանության նախարարությանը»,- լկտիաբար շարունակում է Ադրբեջանի ԱԳՆ-ն։

«Անդրադառնալով Ադրբեջանի գյուղերի՝ անկլավների և էքսկլավների հարցին՝ Հայաստանի վարչապետը ևս մեկ անգամ հայտարարեց, որ Ադրբեջանը իբր օկուպացրել է 31 գյուղերի տարածքներ, ինչը քաղաքական շահարկման մաս է։ Վարչապետին, ով իր նախորդ հայտարարություններում նշում էր, որ այդպիսի գյուղեր կան, հիշեցնենք, որ Հայաստանը պարտավորություններ ունի ադրբեջանական ութ գյուղ վերադարձնելու համար։ Անդրադառնալով տարածքային ամբողջականությանը և սահմանազատման իրականացմանը՝ հիմնված 1991 թվականի սահմանների և Ալմա-Աթայի հռչակագրի վրա, ավելի լավ է հայկական կողմը բացատրի, թե ինչու վերջին 35 տարիներին չի հարգում այդ քարտեզներն ու համաձայնագրերը, հրաժարվում է ընդունել խորհրդային քարտեզներում նշված սահմանները և օկուպացված ադրբեջանական տարածքները։

Վարչապետին, ով պնդում է, որ Հայաստանը պաշտպանում է իր բոլոր հարևանների տարածքային ամբողջականությունը, ուզում եմ հիշեցնել Ադրբեջանի տարածքային ամբողջականության նկատմամբ շարունակվող պահանջները, որոնք արտացոլված են Հայաստանի Սահմանադրության, գործող օրենսդրության, պաշտոնական նամակների, պաշտոնական հայտարարությունների, փաստաթղթերի մեջ։ տարածված միջազգային կազմակերպությունների և դատարանների կողմից։

Եթե ​​հայկական կողմն իսկապես շահագրգռված է խաղաղ գործընթացով, ապա պետք է հրաժարվի Ադրբեջանի տարածքային ամբողջականության և ինքնիշխանության նկատմամբ հավակնություններից»,- ասված է հայտարարության մեջ։ Չնայած գաղափարը բավականին քաոսային է ներկայացվում, սակայն ակնհայտ է, որ սա Հայաստանի Սահմանադրության փոփոխության հերթական պահանջն է և տարածքները վերադարձնելու մերժումը: