Բուժքույր պատգամավորի կարծիքով՝ պատգամավորին թմրանյութերի գործածման թեստ հանձնելու հորդորը վիրավորանք է․ Անուշ Պողոսյան
- Armen Sukiasyan
- Sep 10
- 1 min read
«Առողջության իրավունք» ՀԿ-ի նախագահ Անուշ Պողոսյանը բժիշկներին ներկայացրել է ՔՊ-ական պատգամավորին, ով ԱԺ առողջապահության հարցերի հանձնաժողովի նախագահն է։
«Այս կինը պատգամավոր Հռիփսիմե Հունանյանն է, մասնագիտությամբ բուժքույր, ԱԺ առողջապահության հարցերի հանձնաժողովի նախագահն է և նա կարծում է, որ եթե պատգամավորին հորդորում են թմրանյութերի գործածման թեստ հանձնել, ապա դա վիրավորանք է և համարժեք պատասխանը պետք է լինի ընտանիքի մորը, կնոջն անվանել անբարո և ուղղորդել սեռավարակի թեստ հանձնել։
Սիրելինե՛րս, այս կառավարությունը 2025 թվականի օգոստոսի 1-ից բժիշկներին աշխատելու համար պարտավորեցնելու է անցնել համապատասխան հետազոտություններ՝ ապացուցելու, որ իրենք թմրամոլ կամ ալկոհոլիկ չեն։ Հիմա ուզում եմ հարցնել այս տիկնոջը՝ ինչ համապատասխան պատասխան է ակնկալում նա բժիշկներից․․․»,- գրել է Պողոսյանը։
Հիշեցնենք՝ «Պատիվ ունեմ» խմբակցության պատգամավոր Թագուհի Թովմասյանն Ազգային ժողովի նախագահին ուղղված նամակում իշխանական Արթուր Հովհաննիսյանից պահանջել էր թմրանյութի թեստ հանձնել, քանի որ նրա պահվածքը կասկածներ է հարուցում:
Ի պատասխան «թմրանյութի թեստին»՝ Արթուր Հովհաննիսյանն էլ խորհրդարանում պահանջել էր, որպեսզի ընդդիմադիր պատգամավոր Թագուհի Թովմասյանը «սեռավարակի թեստ» հանձնի, քանի որ նա մի քանի բնակարան ունի Երևանում:
