Վտանգավոր է համագործակցությունը, եթե այն արվում է ինչ-որ մեկի դեմ, այս դեպքում դաշնակցի դեմ. Լևոն Քոչարյան

Ընդդիմությունը դեմ չէ արևմտյան կենտրոնների հետ աշխատանքին, նման բան նախկինում էլ է եղել ԵՄ-ի և ՆԱՏՕ-ի հետ, բայց այդ համագործակցությունը վտանգավոր է, եթե այն արվում է ինչ-որ մեկի դեմ, այս դեպքում դաշնակցի դեմ: Այս մասին, այսօր՝ մարտի 15-ին, ԱԺ արտաքին հարաբերությունների հանձնաժողովում ՀՀ կառավարության ծրագրի (2021-2026 թթ.) 2023 թվականի կատարման ընթացքի եւ արդյունքների մասին զեկույցի քննարկման ժամանակ դիմելով Հայաստանի ԱԳ նախարար Արարատ Միրզոյանին, ասաց «Հայաստան» խմբակցության պատգամավոր Լևոն Քոչարյանը։

«Եթե նայում ենք 2018-ից վարվող քաղաքականությանը, ապա գոնե սխալները միակողմանի չեն եղել:

Նեղացած կնոջ օրինակը չպետք է լինի, երբ ամուսինը դավաճանում է, ինքն էլ դրա դիմաց գնում դավաճանում է, բայց դրանից ոչ մի բան չի շահում, ուղղակի դառնում է փչացած»,- պատկերավոր բացատրեց Քոչարյանը։

Ի պատասխան Արարատ Միրզոյանն ասաց. «Չեի ուզի, բայց անկեղծորեն ցավում եմ, որ մեր կարգավիճակը տենց եք տեսնում եւ մեզ դավաճանվող կնոջն եք նմանեցնում, որ պարտվոր է համակերպվել մնացած բաների հետ:

Ես ձեզ վստահեցնում եմ, որ Հայաստանը որեւէ մեկի դեմ, որեւէ ծրագրում ներգրավված չի եւ իր հարաբերություններն այդպես չի կառուցում: Եթե նկատի ունեք ՌԴ-ն եւ մեր հարաբերությունների խորացումն Արեւմուտքի հետ, ապա ուղիղ կարող եմ ասել ԵՄ-ի հետ մեր հարաբերությունների խորացումն ուղղված չէ Ռուսաստանի դեմ: Նույնիսկ նպատակ չունի հարեւանների դեմ օգտագործել: Նպատակը միայն ՀՀ անվտանգության բարձրացումն է»: