Սա ընդունված է քաղաքականության մեջ, աշխարհում ընդունված բողոքի արտահայտման տարբերակ է․ Ռոբերտ Քոչարյանը՝ Թուրքիայի դրոշը վառելու մասին

«Ոչ մի բան մոռացված չէ։ Ոչ մի կառավարություն, ոչ մի կուսակցություն չի կարող այս էջը փակել կամ մոռացության մատնել»,- այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանը, որն ընտանիքի հետ Ծիծեռնակաբերդի հուշահամալիրում էր։

 Արձագանքելով Ադրբեջանի ԱԳՆ-ի՝ Թուրքիայի դրոշ վառելու հետ կապված արձագանքին, ասաց․ «Ընդհանրապես որևէ երկրի դրոշ վառելուն կողմնակից չեմ, բայց սա ընդունված է քաղաքականության մեջ և աշխարհում ընդհանրապես ընդունված բողոքի տարբերակ է։ Եթե կա երկիր, որի քաղաքականությունը որևէ մեկ այլ երկրի ժողովրդին ցավ է պատճառում, ապա սա բողոքի արտահայտման ձև է։ Իրենց միջոցառումն էր,  արել են շատ կազմակերպված»։

Ինչ վերաբերում է Թուրքիայի ժխտողական քաղաքականությանը, ապա ՀՀ երկրորդ նախագահն ասաց․ «Սա նորություն չէ, որ Թուրքիան ժխտում է և շարունակելու է ժխտել։ Ես չեմ տեսնում, որ Թուրքիան իր քաղաքականությունը փոխելու է, բայց դա  չի նշանակում, որ մենք պետք է հարմարվենք Թուրքիայի մոտեցմանը։ Մենք մեր ճշմարտությունը ունենք, սա ճանաչված փաստ է»։