Թեհրանում ավելի քան 2,5 միլիոն բնակչի համար նախատեսված ապաստարաններ են պատրաստվում

Մերձավոր Արևելքում լարվածության աճի ֆոնին Իրանի մայրաքաղաքի իշխանությունները ձեռնարկում են անվտանգային միջոցառումներ՝ ուղղված քաղաքացիական պաշտպանությանը։ Թեհրանի ճգնաժամային կառավարման կազմակերպության ղեկավար Ալի Նասիրիի փոխանցմամբ՝ ներկայում իրականացվում են նախապատրաստական աշխատանքներ շուրջ 2,5 միլիոն բնակչի համար ապաստարաններ կազմակերպելու նպատակով։

Այս նպատակով նախատեսվում է օգտագործել քաղաքի ստորգետնյա ենթակառուցվածքները։ Մասնավորապես, ապաստարանները կտեղակայվեն ավելի քան 300 ստորգետնյա տարածքներում, այդ թվում՝ ավտոկայանատեղիներում և մետրոպոլիտենի 82 կայարաններում։ Այս վայրերը համապատասխանեցվում են անհրաժեշտ անվտանգային չափանիշներին՝ արտակարգ իրավիճակներում մարդկանց ընդունելու համար։

Ներկայումս ընթանում է անհրաժեշտ թույլտվությունների ստացման և տեխնիկական փուլերի ավարտի գործընթացը։ Ըստ իրանական կողմի՝ այս քայլերն ուղղված են մայրաքաղաքի բնակչության պաշտպանվածության մակարդակի բարձրացմանը և հնարավոր ռիսկերին դիմակայելու պատրաստվածությանը։