Թրամփը Գազայի հատվածում հրադադարի կոչ է արել. սպասվում է Նեթանյահուի այցը Վաշինգտոն

ԱՄՆ նախագահ Դոնալդ Թրամփը կիրակի օրը կոչ է արել առաջընթացի հասնել Գազայի պատերազմում հրադադարի հաստատման շուրջ բանակցություններում։

«Գործարք կնքեք Գազայում։ Վերադարձրեք պատանդներին», - գրել է ԱՄՆ նախագահը Truth Social սոցիալական ցանցում։

Ինչպես հաղորդում է Associated Press-ը, իսրայելցի պաշտոնյան հայտնել է, որ առաջիկա շաբաթներին նախատեսվում է վարչապետ Բենիամին Նեթանյահուի այցը Վաշինգտոն, ինչը նոր համաձայնագրի հարցում հնարավոր առաջընթացի նշան է։

Պաշտոնյան հրաժարվել է քննարկել այցի նպատակը և, անանուն մնալու պայմանով, պատմել է պլանների մասին, որոնք դեռ վերջնականապես համաձայնեցված չեն։ Ուրբաթ օրը Թրամփը գործարք կնքելու հույս է հայտնել՝ նշելով, որ հրադադարի մասին համաձայնագիրը կարող է ձեռք բերվել հաջորդ շաբաթվա ընթացքում։

Պատասխանելով լրագրողների հարցերին՝ նա ասել է. «Աշխատում ենք Գազայի հարցով և փորձում ենք հոգ տանել դրա մասին»։

Չնայած հրադադարի մասին ութշաբաթյա համաձայնագրին, որը ձեռք է բերվել հենց այս տարվա սկզբին՝ Թրամփի պաշտոնը ստանձնելու ժամանակ, այդուհետ կողմերին նոր համաձայնության բերելու փորձերը ձախողվել են։

Նեթանյահուի գլխավոր խորհրդականը՝ Իսրայելի ռազմավարական հարցերի նախարար Ռոն Դերմերը, այս շաբաթ պետք է մեկներ Վաշինգտոն՝ հրադադարի շուրջ բանակցությունների համար։