Արցախցիների կողմնորոշումը, թե արդյոք Արցախն Ադրբեջանի մաս է, թե ոչ, կախված է ՀՀ քաղաքացիների առաջիկա ընտրությունից. Շահրամանյան

Եռաբլուրում «Արցախի կանչը» հուշահամալիրի բացմանը, Արցախի անկախության օրը, լրագրողների հետ զրույցում Արցախի նախագահ Սամվել Շահրամանյանը անդրադարձավ Նիկոլ Փաշինյանի այն հայտարարությանը, թե Արցախը Ադրբեջանի տարածքային ամբողջականության մաս ճանաչելը և մնացած քայլերը իրականացվում են ՀՀ քաղաքացու կողմից տրված մանդատի շրջանակներում։

«Եվ ինքը ասում է․ եթե դուք դեմ եք այն ամենին, ինչ անում եմ, հեռացրեք և շարունակեք առանց ինձ։ Այս պարագայում ես համարում եմ, որ ցանկացած ՀՀ քաղաքացի՝ անկախ նրանից մասնակցել է ընտրություններին, ընտրել է այդ քաղաքական ուժին, կրում է իր բաժին պատասխանատվությունը։ Ես հուսով եմ, որ առաջիկա հնարավորության դեպքում, նկատի ունեմ՝ ընտրությունների ժամանակ, ՀՀ քաղաքացին իր խոսքը կասի, և ըստ դրա մենք՝ որպես Արցախի իշխանության ներկայացուցիչներ, արցախցիներ, ևս կկողմնորոշվենք այդ հարցում»,– ասաց նա։