Ակնե. Ինչպես բուժել

Ակնեն մաշկային խնդիր է, որն առաջանում է, երբ մազապարկը խցանվում է ճարպով և մաշկի մահացած բջիջներով:

Այն դրսևորվում է սպիտակ և սև կորյակներով․ առավել տարածված է դեռահասների շրջանում, թեև կարող է հանդիպել բոլոր տարիքներում:

Կան ակնեի արդյունավետ բուժումներ, սակայն հիվանդությունը կարող է կայունանալ: Հանգույցները լավանում են դանդաղորեն, և երբ դրանցից մեկը սկսում է անհետանալ, մյուսները կարող են հայտնվել հարևանությամբ կամ ավելի հեռու շրջաններում:

Կախված ծանրության աստիճանից, ակնեն կարող է առաջացնել հուզական տառապանք և մաշկի սպիացում: Որքան վաղ սկսվի բուժումը, այդքան կնվազի նման խնդիրների ռիսկը:

Ակների ախտանիշները տարբեր են՝ կախված հիվանդության ծանրությունից:

Ակնեն կարող է դրսևորվել հետևյալ ցանային տարրերով՝

սպիտակ կորյակներ (փակ խցանված ծակոտիներ),

սև կորյակներ (բաց խցանված ծակոտիներ),

փոքր կարմիր, լարված հանգույցիկներ (պապուլաներ),

պզուկներ (թարախաբշտիկեր կամ պոստուլաներ),

մաշկի տակ մեծ, պինդ և ցավոտ հանգույցներ (նոդուլաներ),

մաշկի տակ ցավոտ և թարախով բշտեր (թարախաբշտեր կամ կիստաներ):

Ակնեն սովորաբար հայտնվում է դեմքի, ճակատի, կրծքի, թիկունքի և ուսագոտու շրջանում:

Բազմաթիվ կանանց մոտ ակնեն կարող է մնալ տասնամյակներ և հաճախ սրանալ դաշտանից առաջ: Ակնեի այս տեսակը հաճախ առանց բուժման վերանում է այն կանանց մոտ, ովքեր օգտագործում են հակաբեղմնավորիչներ:

Մեծ տարիքով չափահասների մոտ ծանր ակնեի հանկարծակի սկիզբը կարող է ահազանգել բժշկական ուշադրության արժանի մեկ այլ հիվանդության առկայության մասին:

Կան մի շարք գործոններ, որոնք ակնեի վրա ունեն միայն թույլ ազդեցություն՝

շոկոլադ կամ յուղոտ սնունդ,

հիգիենա. ակների պատճառը կեղտոտ մաշկը չէ, իսկ պինդ օճառները և քիմիական նյութերը, հակառակը, կարող են գրգռել մաշկը և վատթարացնել ակնեն,

կոսմետիկ միջոցներ. հատկապես, եթե U չեն պարունակում, չեն փակում անցքերը և կանոնավոր հեռացվում են: