Թոքի քաղցկեղը վաղ փուլերում կարող է ընթանալ առանց արտահայտված ախտանշանների. ինչի՞ն պետք է ուշադրություն դարձնել և ի՞նչ անել
Նոյեմբերը թոքի քաղցկեղի դեմ պայքարի և իրազեկման ամիսն էլ։ Թոքի քաղցկեղի վաղ հայտնաբերումը կարևոր նշանակություն ունի բուժման արդյունավետության համար։ ՀՀ առողջապահության նախարարությունից նշում են, որ հիվանդությունը վաղ փուլերում կարող է ընթանալ առանց արտահայտված ախտանշանների, ուստի կարևոր է ճանաչել հնարավոր նախազգուշացնող նշանները և ուշադրություն դարձնել ռիսկի գործոններին։
Ինչի՞ն պետք է ուշադրություն դարձնել և ի՞նչ անել
Մի՛ անտեսեք երկարատև հազը։ Եթե հազը չի անցնում կամ փոխում է իր բնույթը, դիմե՛ք բժշկի։
Արյունախխումը տագնապի ազդանշան է։ Խորխի մեջ նույնիսկ փոքր քանակությամբ արյան առկայության դեպքում անհրաժեշտ է անհապաղ դիմել բժշկի։
Հրաժարվե՛ք ծխելուց։ Այն թոքի քաղցկեղի հիմնական ռիսկի գործոններից է։
Պաշտպանվե՛ք պասիվ ծխելուց։ Ուրիշների ծխախոտի ծուխը նույնպես վնասակար է և բարձրացնում է հիվանդության առաջացման ռիսկը։
Մի՛ անտեսեք շնչառական փոփոխությունները։ Շնչահեղձությունը և կրծքավանդակի ցավը բժշկի դիմելու պատճառ են։
Մի՛ սպասեք ախտանշանների ի հայտ գալուն։ Ռիսկի գործոնների գնահատումը և բժշկի հետ խորհրդակցությունը կարող են կարևոր դեր ունենալ հիվանդության վաղ հայտնաբերման գործում։
«Իրազեկվածությունը, կանխարգելումը և ժամանակին դիմելը կարող են կյանքեր փրկել»,- ընդգծել են նախարարությունից։
