Հայտնի է, թե ով կլինի Թուրքիայի հետ երկխոսության բանագնացը․ «Yerkirmedia.am»
Yerkirmedia.am-ի տեղեկություններով՝ Թուրքիայի հետ երկխոսության համար հատուկ ներկայացուցիչ կնշանակվի ԱԺ փոխնախագահ Ռուբեն Ռուբինյանը:
Լրատվամիջոցը գրում է․
«Ռուբինյանը «Քաղաքացիական պայմանագիր» կուսակցության հիմնադիր անդամ է, 2015-2017թթ.՝ վարչության անդամ, մամուլի խոսնակ: 2018 թվականի մայիսին, առանց դիվանագիտական աստիճան ունենալու, նշանակվել է ՀՀ արտաքին գործերի փոխնախարար: Իսկ դեկտեմբերին պատգամավոր է դարձել «Իմ քայլը» դաշինքի ցուցակով:
Հատկանշական է 2019 հունիսին ՀՀ ԱԺ Արտաքին հարաբերությունների մշտական հանձնաժողովի նախագահ Ռուբինյանի սկանդալային քվեարկությունը. ԵԽԽՎ-ում, իր խոսքով, պատահաբար դեմ է քվեարկել ռուսական պատվիրակության ձայնի վերականգման իրավունքին։
Այսօր արդեն նրան պատրաստվում են նշանակել Թուրքիայի հետ երկխոսության բանակցող: Չի բացառվում, որ այս ձևաչափում ներկայացուցիչ ունենա նաև Ռուսաստանը: Ռուսաստանի ԱԳՆ հաստատել էր, որ Հայաստանը դիմել է Ռուսաստանին՝ Երևանի և Անկարայի միջև հարաբերություններում միջնորդական դեր ստանձնելու համար՝ հավելելով, որ Ռուսաստանը շահագրգռված է և ջանքեր է գործադրել հայ-թուրքական հարաբերությունների կարգավորման համար»:
