«Ալիևը Հայաստան բենզին է ուղարկել, որ Փաշինյանն ընտրություններից առաջ դրանով կապի ընտրողների աչքերը»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Ադրբեջանից ներկրված էժան բենզինի մասին․

Հայ ազգ, աչքդ լույս, Խաչատուր Սուքիասյանի բենզացակայաններում ադրբեջանական բենզինը լիտրը 440 դրամով է վաճառվում։ Վերջ, Ադրբեջանի տարածքով ղազախական 4-րդ կարգի, անասնակեր ցորենի ու Ադրբեջանից բենզինի ներկրումով բաղձալի խաղաղություն հաստատվեց, Ադրբեջանը զորքերը հանեց Հայաստանում օկուպացրած տարածքներից, Բաքվից հայ գերիներին ազատեց, այլևս ճանաչում է Հայաստանի տարածքային ամբողջականությունը, էլ չի հայտարարում 300 հազար ադրբեջանցիների «Արևմտյան Ադրբեջան վերադարձի» մասին, չի պահանջում փոխել ՀՀ Սահմանադրությունը, իսպառ դադարեցրել է հակահայկական քարոզչությունը։ Սրանից մոտ 10 տարի առաջ Վրաստանում կայացած հանդիպման ժամանակ ադրբեջանցի հայտնի քաղաքագետներից մեկին հարցրի՝ ե՞րբ է հայ-ադրբեջանական հակամարտությունը լուծվելու։ Ասաց՝ 2024 թվականին, երբ Ադրբեջանից արդյունահանվող նավթը հատնի։ Ադրբեջանի նավթային պաշարները մուտ են սպառվելուն, Ադրբեջանի նավթ վերամշակող ձեռնարկությունները քիչ հզորություն ունեն, Ադրբեջանն ինքն է արտերկրից բենզին ներկրում, Ադրբեջանն Իրան չէ, Ադրբեջանում բենզինը բավական թանկ է։ Սակայն Իլհամ Ալիևը Հայաստան բենզին է ուղարկել, որ Նիկոլ Փաշինյանը ԱԺ ընտրություններից առաջ դրանով կապի Հայաստանի ընտրողների աչքերը։ Ով խելք ունի, այս պարզ իրողությունը հասկանում է»։