«Ադրբեջանը հացահատիկ և վառելիք բաց չէր թողնում դեպի սովահար Հայաստան»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Այս երկու լուսանկարներից առաջինում երեկ Վրաստանի տարածքով Հայաստան մտած ադրբեջանական բենզինի 22 վագոններով գնացքն է:

Երկրորդ լուսանկարում 1960 թվականն է՝ Խորհրդային Հայաստանի քաղաքացիները դուրս են եկել հրապարակ և իրենց շնորհակալությունն են հայտնում: Ադրբեջանական գազը մտնում է Հայաստան:

Այն տարիներին Սևանի փրկության համար կարևորվում էր երկու նախագիծ.

ա/ Արփա-Սևանը, որը ջուր էր բերելու մեր գեղեցկուհուն,

բ/ ադրբեջանական գազը:

Ուզում եմ կրկին հիշեցնել նաև, որ 1918-1920 թվականներին, ի պատասխան ՀՀ ղեկավարության խնդրանքներին, Ադրբեջանի ղեկավարությունը հացահատիկ և վառելիք բաց չէր թողնում դեպի սովահար Հայաստան:

Եվ վերջապես մի հարց, որ երեկ ինձ տվել էին մի քանի ընկերներ:

Ես անձնապես ադրբեջանական բենզին լցնելո՞ւ եմ իմ մեքենայի բաքը:

Ո՛չ, բարեկամներ, քանի որ արդեն ամիսներ էլեկտրոմոբիլ եմ վարում:

Իսկ եթե ավելի լուրջ, ապա ասեմ, որ փորձում եմ գնել հայկականը՝ ինչ ապրանք էլ լինի: Եթե կա հայկականը, ապա չեմ գնում օտարը՝ լինի թուրքական, ռուսական կամ բելառուսական»։