Սամվել Կարապետյանի գործով ներգրավված է 53 քննիչ. 130 օրից ավելի է՝ «չեն կարողանում» ավարտել նախաքննությունը, բայց պահանջում են, որ կալանքը պահպանվի. Վարդևանյան
- Armen Sukiasyan
- 9 hours ago
- 1 min read
Սամվել Կարապետյանը 130 օրից ավելի է՝ ապօրինի կալանավորված է, բայց 53 քննիչ «չեն կարողանում» ավարտել նախաքննությունը, այնինչ պահանջում են, որ կալանքը պահպանվի, շեշտում է փաստաբան Արամ Վարդևանյանը։
«Հայաստանում կալանքի համատարած կիրառումն այլևս հայտնի է բոլորին: Անձնական ազատության իրավունքը սահմանադրական երաշխիք է և պահանջում է իրավապահներից հարգել ազատության կանխավարկածը:
Հանրային հնչեղություն ունեցող բազմաթիվ գործերով արձանագրվում է այդ պահանջի ուղիղ անտեսումը և տևական խախտումը: Համատարած խնդիր է կիրառված կալանքի պահպանումը ստանդարտ, ձևական հիմնավորումներով իբրև՝ կատարվում է նախաքննություն, կամ դեռևս դատավարական գործողություններ պետք է կատարվեն:
Որքանո՞վ է առհասարակ ողջամիտ նման «իրավական» պնդում կատարելը, երբ օրինակ՝ Սամվել Կարապետյանի գործով ներգրավված է 53 քննիչ: Այսինքն՝ 130 օրից ավելի է՝ ապօրինի կալանավորված է Սամվել Կարապետյանը, բայց 53 քննիչ դեռևս չեն կարողանում ավարտել նախաքննությունը, չեն կարողանում նվազագույն ջանասիրություն ապահովել, բայց պահանջում են, որ կալանքը պահպանվի:
Կալանքի անհիմն պահպանումը համարժեք է արդարադատության մերժմանը, համարժեք է արդարության մերժմանը, համարժեք է մարդասիրության մերժմանը:
Ազատությո՛ւն բոլոր քաղբանտարկյալներին»,- սոցցանցի իր էջում գրել է Արամ Վարդևանյանը։
