«Նիկոլին հաջողվում է ժողովրդին զբաղեցնել պատարագներով ու սաղմոսներ կարդալով». Նորիկ Նորիկյան

«Արդար Հայաստան» կուսակցության նախագահ Նորիկ Նորիկյանի ֆեյսբուքյան գրառումը. «Նիկոլին հաջողվում է ժողովրդին զբաղեցնել պատարագներով ու սաղմոսներ կարդալով․․․

Ինչպես ասում են՝ Աստված էլ բեթարից ազատի․․․

Պատարագները հրաշալի միջոց են հասարակության ուշադրությունը շեղելու գլխավոր ու ռազմավարական հարցերի քննարկումից ու դրանց վերաբերյալ հանրությանը հաշվետու լինելուց։

Փոխարենը իշխանությունը հնարավորինս մանրամասն տեղեկատվություն ներկայացնի ժողովրդին, թե․

1․ Ի՞նչ է քննարկվել երկու օր առաջ Ադրբեջանի Գաբալա քաղաքում ՀՀ փոխվարչապետ Մհեր Գրիգորյանի և ԱՀ փոխվարչապետ Շահին Մուստաֆաևի նախագահությամբ տեղի ունեցած երկու երկրների միջև պետական սահմանի սահմանազատման և սահմանային անվտանգության հարցերով հանձնաժողովների 12-րդ հանդիպմանը,

2․ Ինչու՞ մեկուկես տարի որևէ սահմանազատում ու սահմանագծում տեղի չի ունեցել,

3․ Ի վերջո, ե՞րբ է սկսվելու ու ավարտվելու այդ գործընթացը,

4․ Ե՞րբ է այդ գործընթացի արդյունքում ադրբեջանական զորքը դուրս գալու ՀՀ ինքնիշխան տարածքներից,

5․ Ե՞րբ է Հայաստանի ու Ադրբեջանի պետական սահմանից դուրս բերվելու երկու պետությունների զինված ուժերը՝ փոխարինելով սահմանապահ զորքերին։

Բացի այդ, փոխարենը իշխանությունը ներկայացնի կոնկրետ արդյունքներ Հայաստանի ու Թուրքիայի միջև հարաբերությունների իրական կարգավորման մասին, զբաղված է պատարագներ կազմակերպելով ու արհեստական հավատացյալ ձևանալու, խաչակնքվելու, մեղքերին թողություն հայցելու, մեղա գալու գործընթացներով։

Ի վերջո, ցանկացած ոք կարող է ապաշխարել, այսինքն՝ կատարած մեղքի համար զղջալ և գործած չարիքի դիմաց հատուցել, բայց ապաշխարության խորհուրդն առաջին հերթին սկսվում է մեղքի գիտակցումից:

Մեղքը գիտակցող անձը պետք է անկեղծ զղջում ունենա և այն այլևս չկրկնելու վճռականություն:

Ի վերջո, ապաշխարող անձը պետք է պատրաստ լինի իր գործած մեղքերի դիմաց նեղություն կրել։

Մեր իրականության մեջ ճիշտ հակառակ գործընթացն է․

Կատարած մեղքի համար չեն զղջում, գործած չարիքի համար չեն հատուցում ու նեղություն չեն կրում, փոխարենը՝ Նիկոլին հաջողվում է ժողովրդին զբաղեցնել պատարագներով ու սաղմոսներ կարդալով՝ երկրի իրական խնդիրները թողնելով անլուծելի․․․

Ինչպես ասում են՝ Աստված էլ բեթարից ազատի․․․»: