Հայաստանի սամբոյի ֆեդերացիան հերքում է մարզիկների քաղաքական աջակցությունը Գյումրիի քաղաքապետին

Հայաստանի սամբոյի ֆեդերացիան բարձր գնահատելով մեր մարզիկների ու մարզիչների տարիներով կառուցած հեղինակությունը, պարտավոր է արձագանքել Գյումրու քաղաքապետարանի հրապարակմանը:

Հայաստանի սամբոյի ֆեդերացիան կոչ է անում զերծ մնալ սամբոյի ազգային հավաքականի անդամների անուններն այս կամ այն քաղաքական շահարկումների առիթ դարձնելուց:  Այս մասին հայտնում է Հայաստանի սամբոյի ֆեդերացիայի մամուլի ծառայությունը։

«Ֆեդերացիան պաշտոնապես հայտարարում է, որ մեր մարզիկների, մարզիչների ու սպորտային գործիչների անունների օգտագործումը՝ որևէ քրեաիրավական գործընթացում ներգրավված անձի պաշտպանությունն ապահովելու նպատակով, լիովին անընդունելի է և վնասում է հայկական սպորտի հեղինակությանը։

Այսպիսի գործողությունները կարող են ստեղծել կեղծ տպավորություն, թե մարզական համայնքը ներգրավված է կամ ներգրավվում է որոշակի անձանց անձնական կամ իրավական խնդիրների լուծման մեջ, ինչը բացարձակապես չի համապատասխանում իրականությանը։

Հայաստանի սամբոյի ֆեդերացիան կոչ է անում դադարեցնել սամբոյի մարզիկների և մարզիչների անունների որևէ ձևով օգտագործումը քաղաքական, անձնական կամ քրեական նպատակներով»,- ասվում է հայտարարության մեջ:

Հիշեցնենք, որ Գյումրու քաղաքապետարանը հաղորդագրություն էր տարածել՝ նշելով, որ ճանաչված մարզիկները և մարզիչները իրենց աջակցությունն են հայտնում Գյումրիի քաղաքապետ Վարդան Ղուկասյանին: