Բժիշկը բացատրել է, թե ինչու է այսօր երիտասարդների շրջանում ինսուլտի վտանգն ավելի բարձր

Նյարդաբան Լի Շվամը բացատրել է, թե ինչու են այսօրվա երիտասարդները բախվում ինսուլտի ավելի բարձր ռիսկի, քան նույն տարիքում եղած ավագ սերունդները։ Նա այս պատճառները քննարկել է Newsweek-ին տված հարցազրույցում։

Հետազոտական տվյալների համաձայն՝ 20-ից 54 տարեկան անձանց շրջանում ինսուլտի վտանգն այժմ գրեթե կրկնակի բարձր է, քան 30 տարի առաջ նույն տարիքային խմբի դեպքում էր։ «Շատ հավանական է, որ այս աճը մեծապես պայմանավորված է երիտասարդ պացիենտների շրջանում շաքարային դիաբետի, ճարպակալման և զարկերակային գերճնշման տարածվածությամբ»,- ասել է Շվամը։

Բժիշկը բացատրել է, որ ավելի երիտասարդ տարիքում ինսուլտների առաջացման միտումը կարող է խթանվել վեյփինգի՝ երիտասարդների շրջանում տարածված սովորության պատճառով, որի առողջապահական հետևանքները բժիշկները դեռ լիովին չգիտեն։

Սրտի հետ կապված խնդիրներից խուսափելու համար մասնագետը երիտասարդներին խորհուրդ է տվել հետևել առողջ սննդակարգի, պահպանել ֆիզիկական ակտիվություն, հրաժարվել ծխելուց և բավարար քնել։ Բացի այդ, բժիշկը հորդորել է պարբերաբար բուժզննում անցնել և վերահսկել զարկերակային ճնշումը, ինչպես նաև արյան մեջ շաքարի և խոլեստերինի մակարդակը։