ՆԳ նախարարն ընդունել է եվրոպացի դիտորդներին
- 2 hours ago
- 1 min read
Կարևորվել է ԱԺ հերթական ընտրությունների ընթացքում միջազգային դիտորդական առաքելությունների դերը՝ ներքին գործերի նախարար Արփինե Սարգսյանն ընդունել է Եվրոպական խորհրդարանի և Եվրոպական Միության ներկայացուցիչներից կազմված դիտորդական առաքելության անդամներին։
ՆԳՆ-ից հայտնում են, որ Արփինե Սարգսյանն ընդունել է Եվրոպական խորհրդարանի պատգամավոր Նատալի Լուազոյի և Հայաստանում ԵՄ պատվիրակության ղեկավար, դեսպան Վասիլիս Մարագոսի գլխավորած պատվիրակությունների ներկայացուցիչներին։
ՆԳՆ հաղորդմամբ, պատվիրակությունների կազմում էին Եվրոպական խորհրդարանի պատգամավորներ, քարտուղարության անդամներ, քաղաքական խմբերի ներկայացուցիչներ։
Նախարար Սարգսյանը կարևորել է հունիսի 7-ին կայանալիք ԱԺ հերթական ընտրությունների ընթացքում միջազգային դիտորդական առաքելությունների դերը։
Նախարարը ներկայացրել է ՆԳ նախարարության մանդատի շրջանակում նախընտրական քարոզարշավի ընթացքում իրականացվող և քվեարկության օրը կատարվելիք աշխատանքները։ Նա նշել է, որ Ոստիկանությունը ծառայություն է իրականացնելու 1997 ընտրատեղամասերում՝ պահպանելով հասարակական կարգն ու ապահովելով ընտրական գործընթացի բնականոն ընթացքը։
Ա.Սարգսյանը ներկայացրել է նաև ընտրողների ցուցակների կազմման և ճշգրտման ուղղությամբ կատարված ծավալուն աշխատանքները։ Նա նաև անդրադարձել է ոլորտում առկա մարտահրավերներին և դրանք հաղթահարելու ուղղությամբ իրականացվող հետևողական աշխատանքներին։
Արփինե Սարգսյանն ընդգծել է, որ ՆԳ նախարարությունը լիովին պատրաստ է ապահովելու քաղաքացիների ընտրական իրավունքի լիարժեք իրացումը՝ նշելով, որ ընտրական գործընթացին միջամտելու կամ քաղաքացիների ազատ կամարտահայտությունը սահմանափակելու ցանկացած փորձ արժանանում է և շարունակելու է արժանանալ օրենքով սահմանված խիստ արձագանքի։
Շնորհակալություն հայտնելով ընդունելության համար՝ պատվիրակության անդամները ներկայացրել են դիտորդական առաքելության նպատակներն ու գործունեության հիմնական ուղղությունները, նաև հետաքրքրվել ԱԺ առաջիկա ընտրությունների կազմակերպման, անվտանգության ապահովման և ընտրական գործընթացների կառավարմանն առնչվող մի շարք հարցերով։
Քննարկվել են ապատեղեկատվության դեմ պայքարի, կիբեռանվտանգության և ընտրական գործընթացների պատշաճ ապահովմանն առնչվող հարցեր։
