Տյառնընդառաջի տոնը՝ Մայր Աթոռում
- Lida Nalbandyan
- Feb 14, 2024
- 1 min read
Փետրվարի 14-ին՝ 40-օրյա մանուկ Հիսուս Քրիստոսի տաճարին ընծայման տոնին, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ, Սուրբ Գայանե վանքում մատուցվել է Սուրբ Պատարագ։
Մայր Աթոռի տեղեկատվական համակարգի հաղորդմամբ, պատարագիչն է եղել Կրասնոդարի և Հյուսիսային Կովկասի հայոց թեմի Ստավրոպոլ քաղաքի Սուրբ Գրիգոր Լուսավորիչ եկեղեցու հոգևոր հովիվ Արժանապատիվ Տ․ Գրիգորիս քահանա Պողոսյանը։
Իր քարոզում Տեր Հայրը, մեկնելով տոնի խորհուրդը և անդրադառնալով քրիստոնյայի կյանքում Տիրոջն ընդառաջ գնալու կարևորությանը, ընդգծել է, որ մարդկանց փրկությունը և հենարանը նույն ինքը Քրիստոս է իր լուսավոր վարդապետությամբ։
Պատարագիչ քահանան հորդորել է հավատացյալներին անսասան պահել հավատքի լույսն իրենց կյանքում և քայլել դեպի Տերն այն ճշմարիտ համոզումով, որ Քրիստոս միշտ օգնական և պահապան է իրեն հավատացողներին։
Սրբազան արարողության ավարտից հետո, հանդիսապետությամբ Բալթյան երկրների հայոց թեմի առաջնորդ Գերաշնորհ Տ. Վարդան եպիսկոպոս Նավասարդյանի, կատարվել է նորապսակների օրհնության կարգ։
Նույն օրը Գարեգին Երկրորդ Ամենայն Հայոց Կաթողիկոսն ընդունել է Մայր Աթոռի տարբեր կառույցներում սպասավորող նորապսակ սարկավագներին՝ ուղեկցությամբ Մայր Աթոռի լուսարարապետ Գերաշնորհ Տ. Մուշեղ եպիսկոպոս Բաբայանի:
Վեհափառ Հայրապետը, իր գնահատանքն ու հայրապետական պատգամը փոխանցելով նորապսակներին, մաղթել է երջանկություն, լինեն միմյանց սիրող ու կարեկից։ Նորին Սրբությունը նաև հորդորել է վերջիններիս ապրել ավետարանական ոգով, որպեսզի աստվածային խաղաղությունն ու սերը մշտապես անպակաս լինեն իրենց նորակազմ ընտանիքներից:
