Դպրոցական նախագծի 4 կանոն, որ ծնողը պետք է իմանա
Դպրոցական նախագիծն ունի հստակ կանոններ՝ խմբի չափից մինչև գնահատականի բաշխում։ Իսկ ամենակարևորը՝ գնահատականն ընդհանուր չէ. յուրաքանչյուր աշակերտ գնահատվում է առանձին։
Ինչպես տեղեկացնում է Iravaban.net-ը, նախագծային ուսուցման նոր ընթացակարգը սահմանված է ԿԳՄՍ նախարարի 2026 թվականի օգոստոսի 26-ի N 47-Լ հրամանով, որով նոր խմբագրությամբ է շարադրվել 2025 թվականի N 09-Լ հրամանի հավելվածը։ Հիշեցնենք, որ հանրակրթության պետական չափորոշչով 7-12-րդ դասարաններում յուրաքանչյուր կիսամյակ առնվազն մեկ նախագիծ պարտադիր է. մանրամասները՝ այս նյութում։
Կանոն 1. Խումբը՝ 3-ից 10 աշակերտ
Կարգի 8-րդ կետով նախագիծն իրականացվում է խմբով՝ նույն դասարանից նվազագույնը 3 և առավելագույնը 10 աշակերտի մասնակցությամբ։ Փոքր դպրոցներում, որտեղ դասարանում 5-ից ոչ ավելի աշակերտ կա, խումբը կարող է բաղկացած լինել նույնիսկ մեկ աշակերտից։
Ընդ որում, 9-րդ կետով խմբում կարող են ընդգրկվել նաև այլ դպրոցների աշակերտներ. այդ դեպքում ուսուցիչներն ու աշակերտները պլանը կազմում են համատեղ, և այն նույնությամբ կիրառվում է բոլոր մասնակից խմբերում։
Կանոն 2. Տևողությունը՝ առնվազն 6 շաբաթ
15-րդ կետով նախագիծը պետք է ունենա առնվազն 6 շաբաթ տևողություն՝ հստակ պլանավորված փուլերով։ Այսինքն՝ մեկ-երկու շաբաթում պատրաստվող աշխատանքը կարգին չի համապատասխանում։ 12-րդ կետով պլանում պարտադիր նշվում են նախագծի տևողությունը, ժամաքանակը, փուլերը՝ ըստ ժամկետների, նպատակը, ակնկալվող արդյունքները և հիմնախնդիրը։
Պլանը նախ քննարկվում և հավանության է արժանանում առարկայական մեթոդական միավորման կողմից, ապա հաստատվում է դպրոցի տնօրենի կողմից (13-րդ և 14-րդ կետեր)։
Կանոն 3. Աշակերտն ինքն է ընտրում թեման
10-րդ կետով ուսուցիչները թեմաների առաջարկները ներկայացնում են յուրաքանչյուր կիսամյակի սկզբում՝ առաջին կիսամյակի համար մինչև սեպտեմբերի հինգերորդ աշխատանքային օրը, երկրորդի համար՝ դեկտեմբերին։ Իսկ 11-րդ կետով պլանը կազմվում է միայն այն բանից հետո, երբ աշակերտներն առաջարկված թեմաներից կատարել են իրենց ընտրությունը։
16-րդ կետով բոլոր մասնակիցները պետք է ունենան հստակ աշխատանքային բաժանում՝ անհատական կամ խմբային, և ինքնուրույն իրականացնեն գործնական, հետազոտական և վերլուծական աշխատանք։
Կանոն 4. Գնահատականը՝ 10 միավոր, յուրաքանչյուր աշակերտին՝ առանձին
21-րդ կետով նախագծի գնահատականը, առավելագույնը 10 միավոր, լրացվում է էլեկտրոնային մատյանում՝ նախագծի համար հատկացված էջում, և յուրաքանչյուր աշակերտ գնահատվում է առանձին։
22-րդ կետով միավորները բաշխվում են երեք բաղադրիչով՝
ընթացք՝ 3 միավոր, որից նախապատրաստական փուլ՝ 0,5, բուն աշխատանք (խնդրի ձևակերպում, հարցերի մշակում, պլանի կազմում, աղբյուրների ուսումնասիրություն, տեղեկության հավաքագրում և վերլուծություն)՝ 2, ավարտ կամ ամփոփում՝ 0,5,
բովանդակություն՝ 4 միավոր, որից թեմային համապատասխանություն՝ 1,5, ամբողջականություն՝ 1, հիմնավորվածություն՝ 1, գիտականություն՝ 0,5,
ներկայացում՝ 3 միավոր, որից ներկայացման ձև (սահիկաշար, ֆիլմ, երաժշտություն, համերգ, նկար, պաստառ, գրքույկ, բեմականացում և այլն)՝ 1,5, խոսքային ներկայացում՝ 1,5։
Սա նշանակում է, որ վերջին օրերին պատրաստված, բայց գեղեցիկ ներկայացված աշխատանքը բարձր գնահատական չի ստանա. ընթացքի 3 միավորից 2-ը տրվում է հենց շաբաթների ընթացքում կատարված աշխատանքի համար։
23-րդ կետով նախագծի տեսակից կախված գնահատման սանդղակները կարող են տարբերվել, սակայն վերոնշյալ չափանիշները պարտադիր են, իսկ 24-րդ կետով գնահատմանը մասնակցում են նախագծում ընդգրկված բոլոր ուսուցիչները։
Ի՞նչ է լինում նախագծի ավարտին
17-րդ կետով նախագիծը պետք է ունենա նյութական կամ ոչ նյութական արդյունք, որը կիրառելի է խնդրի լուծման համար։ 18-րդ կետով պլանը և վերջնական արդյունքը տեղադրվում են առցանց հարթակում՝ e-school-ում, Moodle-ում, Padlet-ում կամ «Պաշարների շտեմարան» կայքում։ Նախագծի ղեկավարը տվյալ առարկայի ուսուցիչն է, որն ավարտին տնօրենին ներկայացնում է գրավոր հաշվետվություն (19-րդ և 20-րդ կետեր)։
Առանձին կանոն է գործում 9-րդ դասարանի «Բնագիտություն» առարկայի համար. 25-րդ կետով ավարտական քննությունը կարող է հանձնվել ուսումնական նախագծի միջոցով՝ 20 միավորանոց համակարգով, և գնահատականը գրվում է ավարտական վկայականում։ Այդ կարգի մանրամասները՝ մեր հաջորդ նյութում։
Ամփոփում
Ամփոփելով՝ դպրոցական նախագիծն իրականացվում է 3-10 աշակերտից բաղկացած խմբով, տևում է առնվազն 6 շաբաթ, թեման աշակերտներն ընտրում են ուսուցիչների առաջարկածներից, իսկ գնահատականը՝ առավելագույնը 10 միավոր, յուրաքանչյուր աշակերտին տրվում է առանձին՝ ընթացքի համար 3, բովանդակության համար 4 և ներկայացման համար 3 միավոր, – տեղեկացնում է Iravaban.net-ը։
