Խնդրում եմ համազգային խանդի տեսարաններ չստեղծել, այն պատճառով, որ հիմա Կոնֆուցիուս կամ չինացի այլ փիլիսոփաներ եմ մեջբերում. Աննա Հակոբյան

Նիկոլ Փաշինյանի կինը Աննա Հակոբյանը գրել է.

«Սաներից մեկը հարցրեց.

– Կա՞ արդյոք մեն մի բառ, որը պետք է ուղեկցի մարդուն իր ողջ կյանքի ընթացքում:

Վարպետն ասաց.

– Արդյո՞ք դա չպետք է լինի «փոխադարձություն»-ը: Այն, ինչ չես ցանկանում ինքդ քեզ, մի՛ արա ուրիշների հանդեպ:

(The Text of The Analects, Chapter 15, 15.24.)

Սաներից մեկն ասաց.

– Ես չէի ցանկանա ուրիշների հանդեպ անել այն, ինչ չէի ցանկանա, որ արվեր իմ հանդեպ:

Կոնֆուցիուսը պատասխանեց.

– Օ՜, դու դեռ այդքան չես հասունացել:

(The Text of The Analects, Chapter 5, 5.12.)

Խնդրում եմ համազգային խանդի տեսարաններ չստեղծել, այն պատճառով, որ հիմա Կոնֆուցիուս կամ չինացի այլ փիլիսոփաներ եմ մեջբերում։ Դա պայմանավորված է բացառապես այս փուլի իմ ուսումնասիրությամբ։ Աստծո կամոք՝ ողջ-առողջ մնամ, ակադեմիական հաջորդ աստիճանի համար կընտրեմ արեւմտյան փիլիսոփայությունը եւ կկիսվեմ Սոկրատեսից ու Պլատոնից, Կանտից ու Հեգելից մեջբերումներով։

Դուք էլ կիսվեք, ձեր նոր իմացություններով. վստահ եմ աշխատանքից ազատ ժամանակ ինչ-որ բան կարդում եք։ Համաձայն չե՞ք. գիտելիքը երբեք շատ եւ ավելորդ չի լինում։

Ուզում եմ նաեւ հիշեցնել, որ «Կրթվելը նորաձեւ է» շարժումը սկսել եմ հենց մե՛ր մեծերին մեջբերելով, հանուն նրա՛նց պատգամի կյանքի կոչման, նրա՛նց նվիրական երազանքների կատարման եւ նրա՛նց հիշատակի հավեժացման։

Կրթվենք, որպեսզի արժանիքներով հարստանանք

Կրթվենք, որպեսզի բռնությունը փոխարինենք սիրով եւ հարգանքով

Կրթվենք, որպեսզի որակ ստանանք

Կրթվենք, որպեսզի փոխադարձության սկզբունքով ապրենք

Կրթվենք, որպեսզի կրթվելուն չընդդիմանանք»։